Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн төсөлтэй холбогдуулан аймаг, нийслэлийн Засаг дарга, Иргэдийн төлөөлөгчдийн хурлын дарга, тэргүүлэгч, төлөөлөгчдийн саналыг сонсож, төсөлд тусгах зорилготой цахим хэлэлцүүлэг Төрийн ордонд өнөөдөр боллоо.
УИХ-ын Нутгийн удирдлагын дэд хорооноос зохион байгуулсан уг хэлэлцүүлэгт УИХ-ын дарга Г.Занданшатар үг хэллээ. Тэрбээр, "ноднин 11 дүгээр сарын 14-нд Үндсэн хуульд оруулсан нутгийн удирдлагатай холбоотой нэмэлт, өөрчлөлт нь нэгдүгээрт, Монгол Улсын засаг захиргаа, нутаг дэвсгэрийн нэгжийн тогтолцоог зохистой болгон, төвлөрлийг сааруулж, нутгийн захиргааг бэхжүүлэх эрх зүйн үндсийг сайжруулсан. Хоёрдугаарт, нутгийн өөрөө удирдах байгууллагын орлогоо өөрөө бүрдүүлэх, төсөв, санхүү, татвар, өмчийн эрх мэдлийг тодорхой болгож, өргөжүүлснээр орон нутгийн бие даан хөгжих боломжийг дэс дараатай бүрдүүлэхийг зорьсон. Гуравдугаарт, хот, тосгоны өөрийн удирдлага, зохион байгуулалтын эрх зүйн үндсийг хуулиар тогтоож, тэдгээрт засаг захиргаа, нутаг дэвсгэрийн нэгжийн удирдлагын зарим эрх хэмжээг шилжүүлэх болсноор удирдлагын бүтцийн давхардлыг арилгаж, хөдөө хөгжих, хот тосгон төлөвшин хөгжих нөхцөлийг бүрдүүлсэн ач холбогдолтой болсон" хэмээв.
Мөн Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийг батлахдаа орон нутаг нь өмчийг эзэмших, захиран зарцуулах, орлого олох, татвар ногдуулах, эдийн засгийн хувьд чадавхитай, өөрөөр хэлбэл нутгийн олон түмний эрх ашгийг хамгаалах, асуудлыг шийдэх эрх хэмжээтэй байх нь Үндсэн хуульд оруулсан нэмэлт, өөрчлөлтийн гол агуулга гэж ойлгох хэрэгтэй гэлээ.
Тэрбээр мөн сонирхсон хүн бүр парламентын шинэчлэлийн загвар болох Lawmaker хуулийн төсөл боловсруулах цахим системээр төслийн зүйл, заалт бүрд санал өгөх, Iawforum сайтаар хэлэлцүүлгүүд өрнүүлэх боломжтойг тэмдэглэлээ.
Дараа нь УИХ-ын Төрийн байгуулалтын байнгын хорооны дарга Л.Энх-Амгалан үг хэлэхдээ хуулийн төслийн анхны хэлэлцүүлгийг чуулганы нэгдсэн хуралдаанаар явуулахаас өмнө аймаг, нийслэлийн Засаг дарга, ИТХ-ын дарга нарын саналыг сонсож байгааг тэмдэглэв.
Үргэлжлүүлэн УИХ-ын гишүүн Ж.Сүхбаатар Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төслийн зарим онцлох зүйлүүдийг танилцуулсны дараа хэлэлцүүлэгт цахимаар холбогдон оролцож байгаа орон нутгийн удирдлагуудын саналыг сонссон юм. Өвөрхангай, Сүхбаатар, Архангай, Завхан, Орхон, Улаанбаатар, Увс, Говь-Алтай, Ховд, Дорнод, Говьсүмбэр, Төв, Дархан-Уул, Сэлэнгэ, Хэнтий, Дундговь зэрэг 18 аймгийн удирдлага хуулийн төсөлд санал хэллээ.
Цахим хэлэлцүүлгийг хааж УИХ-ын Төрийн байгуулалтын байнгын хорооны дарга Л.Энх-Амгалан үг хэлэв. Тэрбээр, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийг орон нутгийн суурь хууль, бага Үндсэн хууль гэж нэрлэдэг. Энэ хуулийг дагаж 300 орчим хуульд өөрчлөлт орно. Маш чамбай хууль бид гаргах хэрэгтэй хэмээн онцлов гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.