ОХУ-ын засгийн газраас бензиний экспортод тогтоосон хоригийг түр хугацаанд цуцлах шийдвэр гаргалаа.
Телеграм сувагт нийтэлсэн мэдээлэлд дурдсанаар “шатахуун үйлдвэрлэгчдийн хувьд бензиний экспортод тогтоосон түр хоригийн үйлчлэлийг 2024 оны 6 дугаар сарын 30 хүртэл зогсоож байна. Үүний сацуу тогтоосон хязгаарлалтууд 7 дугаар сарын 1-нээс 8 дугаар сарын 31 хүртэл хэвээр хадгалагдана”.
Холбогдох тогтоолд Ерөнхий сайд Михаил Мишустин гарын үсэг зурсан бөгөөд уг тогтоол нийтлэгдсэн өдрөөс хэрэгжиж эхлэх ажээ.
Эрчим хүчний яамны мэдээлэлд дурдсанаар, нефть боловсруулах үйлдвэрүүд, нефть хадгалах баазуудад 2,1 сая орчим тонн автобензин, 250 мянган тонн дизель түлшний нөөц хуримтлагдаад байгаа нь дотоод зах зээлийн хэрэгцээг бүрэн хангахад хүрэлцэх ажээ.
Тус яамнаас мэдээлснээр, цаашдаа хоригийг зогсоох хугацааг сунгаж магадгүй бололтой.
Сануулан дурдахад, эрэлт ихтэй үед түлш шатахууны дотоодын захын тогтвортой байдлыг хангах үүднээс засгийн газар 3 дугаар сарын 1-нээс 8 дугаар сарын 31 хүртэл бензиний экспортыг хориглосон билээ. Гэхдээ олон улсын хүмүүнлэгийн тусламжийг хүргэхэд шаардлагатай болон хувийн хэрэгцээнд зориулсан түлш шатахуун, Евразийн Эдийн засгийн холбооны гишүүн орнуудад засгийн газар хоорондын хэлэлцээрийн дагуу нийлүүлж буй түлш шатахуунд дээрх хамаарахгүй юм.