Израилын арми 10 дугаар сарын 9-ний оройны байдлаар Газын зурвас дахь хэт давруу үзэлтнүүдийн 1707 байгууламжид цохилт өглөө гэж армийн хэвлэлийн алба мэдэгдсэнийг Израилын төрийн мэдлийн радио телевизийн компани уламжилсан байна.
Аравдугаар сарын 7-ны өглөөнөөс хойш Израилын арми пуужин харвах 475 төхөөрөмж, 73 цэргийн объект, стратегийн цэргийн 24 байгууламж, газар доорх 22 объектод цохилт өгчээ.
Даваа гарагт тус улсын армийн хэвлэлийн албанаас мэдээлэхдээ, Газын зурвас дахь ХАМАС-ын цэргийн объект, хонгил, мөн “Исламын жихад”-ын объектуудад агаар, далай тэнгисээр цохилт өгч байна гэжээ. Мөн “батлан хамгаалах хүчний хөлөг онгоцнууд террорист байгууллагуудын олон тооны байгууламжуудад цохилт өглөө” гэж мэдээлсэн байна.
Израил-Палестины мөргөлдөөний улмаас амиа алдсан израилчуудын тоо 900-д хүрсэн тухай Haaretz хэвлэл даваа гаргийн орой мэдээлжээ. Палестины Эрүүл мэндийн яамны хамгийн сүүлийн үеийн мэдээллээр, Газын зурваст өгсөн Израилын цохилтод амь үрэгдсэн хүний тоо 560 даваад байна.