Н.Сугар: Тэгш, сондгой хязгаарлалтын үеэр иргэд хувийн нэгдсэн зохион байгуулалттай байхыг уриалъя. Тэг зогсолтод орох эрсдэл бий

Хичээлийн шинэ жил эхэлж байгаатай холбогдуулан замын хөдөлгөөний түгжрэл, ачааллыг бууруулах талаар авах зарим арга хэмжээний тухай Нийслэлийн Засаг дарга бөгөөд Улаанбаатар хотын захирагчийн захирамж гарчээ.

Ингэхдээ автомашины улсын дугаарын тэгш, сондгойгоор замын хөдөлгөөнд оролцуулах зохицуулалт хийх юм байна.

Наймдугаар сарын 26-ны бямба гарагаас эхлэн өдөр бүр 08:00-20:00 цагийн хооронд:

• Сондгой тоо буюу 1, 3, 5, 7, 9-өөр төгссөн автомашиныг 2023 оны наймдугаар сарын 27, 29, 31, Есдүгээр сарын 2, 4, 6, 8, 10, 12, 14-ний өдрүүдэд замын хөдөлгөөнд оролцоно.
• Тэгш тоо буюу 0, 2, 4, 6, 8-аар төгссөн автомашиныг наймдугаар сарын 26, 28, 30, Есдүгээр сарын 1, 3, 5, 7, 9, 11, 13-ны өдрүүдэд замын хөдөлгөөнд оролцоно.

ЗАХИРАМЖ:

2023 оны 08 сарын 17-ны өдөр

Дугаар А/940

Улаанбаатар хот

Замын хөдөлгөөний түгжрэл, ачааллыг бууруулах талаар авах зарим арга хэмжээний тухай

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 24 дүгээр зүйлийн 24.1.12 дахь заалт, 66 дугаар зүйлийн 66.1 дэх хэсэг, Монгол Улсын нийслэл Улаанбаатар хотын эрх зүйн байдлын тухай хуулийн 8 дугаар зүйлийн 8.3.11 дэх заалт, 22 дугаар зүйлийн 22.5 дахь хэсэг, Замын хөдөлгөөний аюулгүй байдлын тухай хуулийн 9 дүгээр зүйлийн 9.4.2 дахь заалт, Авто замын тухай хуулийн 12 дугаар зүйлийн 12.1.8 дахь заалтыг тус тус үндэслэн ЗАХИРАМЖЛАХ нь:

1. 2023-2024 оны хичээлийн шинэ жил эхэлж байгаатай холбогдуулан замын хөдөлгөөний түгжрэл, ачааллыг бууруулах зорилгоор дараах арга хэмжээг авч хэрэгжүүлэхийг дор дурдсан байгууллага, албан тушаалтанд үүрэг болгосугай:

1.2.Авто замын засвар, хот тохижилт, шугам сүлжээ, зөөврийн ус хангамж, дипломат байгууллагын автомашин болон зочид төлөөлөгчдийн цуваа, нийтийн зорчигч тээврийн хэрэгсэл, стандартын шаардлага хангасан такси, сургууль цэцэрлэгийн хүүхэд болон ажилчдын автобус, таних тэмдэг бүхий хэвлэл мэдээллийн байгууллагын тээврийн хэрэгсэл, тусгай, дуут болон гэрэл дохиогоор тоноглогдсон, хойшлуулшгүй ажил, үүрэг гүйцэтгэж яваа тээврийн хэрэгсэлд энэ захирамжийн 1.1-д заасан зохицуулалт хамаарахгүй байхаар замын хөдөлгөөний аюулгүй байдал, хөдөлгөөн зохицуулалтын ажлыг зохион байгуулахыг Тээврийн цагдаагийн албаны, Замын цагдаагийн газар (С.Баасанжав), “Замын хөдөлгөөний удирдлагын төв” ОНӨТҮГ (С.Адъяасүрэн)-т;

1.3.Ерөнхий боловсролын сургуулийн орчинд сурагчид гэмт хэрэг, хэв журмын зөрчил болон зам, тээврийн ослоос урьдчилан сэргийлэх зорилгоор 2023 оны 08 дугаар сарын 25-ны өдрөөс 09 дүгээр сарын 12-ны өдрийн хооронд “Сургууль, цэцэрлэг орчмын эргүүл”-д ажиллах эцэг, эх, асран хамгаалагч, харгалзан   дэмжигч,   хөдөлгөөний   аюулгүй   байдлыг  хангахад  туслах  ажилтан, олон нийтийн цагдаагийн ажилтан, эргүүлийн цагдааг томилон явган хүний гарц, гарамтай хэсгүүд дээр ажиллуулах арга хэмжээ авч, мэргэжлийн удирдлагаар хангаж ажиллахыг Нийслэлийн Цагдаагийн удирдах газар (О.Ганбат), Тээврийн цагдаагийн албаны Замын цагдаагийн газар (С.Баасанжав), Нийслэлийн Боловсролын газар (Б.Амартүвшин)-т;

1.4.Ерөнхий боловсролын сургууль, цэцэрлэг орчмын аюулгүй байдлыг хангаж, сургуулийн хүүхдийн автобусанд үзлэг, шалгалт хийх арга хэмжээ авахыг Тээврийн цагдаагийн албаны, Замын цагдаагийн газар (С.Баасанжав), Нийслэлийн Боловсролын газар (Б.Амартүвшин), Нийслэлийн Нийтийн тээврийн газар (С.Жавхлантбаатар) болон дүүргүүдийн Засаг дарга нарт даалгажээ.

Энэ жил нийтийн тээврийн хүртээмжийг хэрхэн нэмэгдүүлэх талаар нийслэлийн Засаг даргын хэвлэлийн төлөөлөгч Н.Сугар мэдээлэл өгөв.

Мөн "Дугаарын хязгаарлалт богино хугацаанд үргэлжлэх учраас иргэд хувийн нэгдсэн зохион байгуулалттай байхыг уриалъя. Ингэхгүй л бол бүгдээрээ тэг зогсолтод орох эрсдэл байгаа. Одоогоор бүрэн ачааллаа аваагүй байна.

Өчигдөр замын хөдөлгөөн ямар болсныг Улаанбаатар хот даяараа мэдэж байгаа. Ийм учраас аль аль талдаа ойлгож хамтдаа ачаалалтай цаг үеийг даван туулахгүй бол болохгүй байна" гэв.

Үргэлжлүүлэн "Түгжрэлийг бууруулах зорилгоор хотын даргын зүгээс автобусны нэгдүгээр эгнээгээр зорчдог өргөн чөлөөг дахин гурваар нэмэгдүүлэх ажлыг зохион байгуулахаар ажиллаж буй.

Дөрвөн өргөн чөлөөнд нэгдүгээр эгнээгээр нийтийн тээвэр зорчвол хүртээмж харьцангуй сайжрах боломжтой. Мөн нийтийн тээвэр нэгдүгээр эгнээгээр зорчиход чөлөөлж өгөх энэхүү арга хэмжээ нь гол шугам болж байгаа" гэлээ.