Хөгжлийн Банкны зээлийн эргэн төлөлтөд хураан авсан үл хөдлөх хөрөнгүүдийг олон нийтэд нээлттэй зарж борлуулах талаар Хөгжлийн Банкны Захиргаа удирдлагын газрын захирал С.Мөрөн мэдээлэл өглөө.
Тэрбээр "2022 оны эхнээс Хөгжлийн Банкны чанаргүй зээлийн эргэн төлөлт эрчимжсэн. Өнөөдрийн байдлаар 1.3 их наяд төгрөгийн зээлийн эргэн төлөлтийг хангуулаад байна. Чанаргүйдсэн зээлийн эргэн төлөлтийг мөнгөн хөрөнгөөс гадна үл хөдлөх хөрөнгөөр хангуулдаг.
Эргэн төлөгдсөн 1.3 их наяд төгрөгөөс 270 гаруй тэрбум төгрөгийн үнэлгээтэй үл хөдлөх хөрөнгө Хөгжлийн Банкны өмчлөлд шилжиж ирсэн. Дээрх хөрөнгүүд нь бүрэн ашиглалтад орсон, бүтээн байгуулалт хийгдэж байгаа гэсэн төлөвтэй байгаа.
Зээлийн эргэн төлөлтөд хураан авсан үнэлгээг суурь үнэ, зарж борлуулах хүртэл гарсан зардлыг нэмээд худалдах үнээ тогтоосон. Хөгжлийн Банкны албан ёсны веб хуудсанд зарж борлуулагдах үл хөдлөх хөрөнгүүдийн дэлгэрэнгүй мэдээлэл тавигдсан байгаа.
Хөгжлийн Банкны өмчлөлд буй үл хөдлөх хөрөнгүүдийг олон нийтэд нээлттэй, ил тод байдлаар худалдан борлуулах үйл ажиллагаа үе шаттай явагдана. Тухайлбал манай банкны мэргэжилтнүүд зургаадугаар сарын 3-14 хүртэл 11:00-20:00 цагийн хооронд борлуулагдах үл хөдлөх хөрөнгийн байршилд өдөр бүр ажиллаж, танилцуулж байгаа.
Зургаадугаар сарын 15-ны 10:00 цагаас худалдан авах ажил идэвхэжнэ. Мөн албан ёсны вэб сайтад худалдан авах саналыг зургаадугаар сарын 15-20 хүртэл авна. Ингээд зургаадугаар сарын 20-ны 14:00 цагаас худалдан авах саналыг нэгтгэнэ. Хамгийн түрүүнд санал ирүүлж, бэлэн мөнгөөр худалдан авагчтай гэрээ байгуулах зарчмыг баримтална.
Худалдан борлуулагдах 18 үл хөдлөх хөрөнгийн байршлын хувьд:
- Ла Колино хотхоны 12 ширхэг орон сууц,
- Сүхбаатар дүүргийн 48 байрны дээд давхрын үйлчилгээний объект
- Баянзүрх дүүргийн нэгдүгээр хорооны "Барилга Мега стор" В1 давхар,
- Нүхтийн аманд Таун Хаус
- Баянзүрх дүүргийн Даймонд төвийн гурван давхарт үйлчилгээний талбайн гэсэн үл хөдлөх хөрөнгийг зарж борлуулна" хэмээн ярилаа.
ХӨГЖЛИЙН БАНКНЫ ӨМЧЛӨЛД ШИЛЖҮҮЛСЭН ҮЛ ХӨДЛӨХ ХӨРӨНГИЙГ НЭЭЛТТЭЙ ХУДАЛДАН БОРЛУУЛНА
Монгол Улсын Хөгжлийн банк нь зээлийн эргэн төлөлтийг бэлэн мөнгөөр, өмчлөх бусад үл хөдлөх хөрөнгөөр, үнэт цаасаар барагдуулан ажиллаж байна. Банкнаас зээлийг бэлэн мөнгөөр барагдуулах зарчим баримталж байгаа боловч чанаргүй, эрсдэл өндөртэй зээлийн эргэн төлөлтийг шүүхийн шийдвэрийн дагуу барьцаа хөрөнгөөр хангуулж, банкны өмчлөлд шилжүүлэн төлж барагдуулах нөхцөл байдал үүссэн юм.
Хөгжлийн банкны өмчлөлд шилжүүлсэн өмчлөх бусад үл хөдлөх хөрөнгийн хэмжээ 2023 оны тавдугаар сарын байдлаар нийт 270.8 тэрбум төгрөгт хүрсэн. Үүнээс Засгийн газрын тогтоолын хүрээнд зээлээр худалдсан үнийн дүн 91.5 тэрбум төгрөг, ашиглалтад орсон худалдан борлуулахад бэлэн үл хөдлөх хөрөнгө 29.7 тэрбум төгрөг, дутуу гүйцэтгэлтэй дуусаагүй барилга 149.6 тэрбум төгрөг байна.
Банкны өмчлөлд шилжүүлсэн үл хөдлөх эд хөрөнгийг зах зээлд санал болгож, эдийн засгийн эргэлтэд оруулахдаа нээлттэй, ил тод, хэн нэгэнд давуу байдал үүсгэхгүй байх зарчмыг баримтлан ажиллаж байна.
Хөгжлийн банкны бүртгэлд байгаа өмчлөх бусад үл хөрөнгийг нөхцөл байдлаар ангилбал:
- Бүрэн ашиглалтад орсон буюу худалдан борлуулахад бэлэн
- Бүтээн байгуулалтын ажил үргэлжилж буй
- Дуусаагүй буюу бүрэн ашиглалтад ороогүй хөрөнгө
Хөгжлийн банкны зүгээс энэ удаа худалдан борлуулахад бэлэн, маргаангүй үл хөдлөх эд хөрөнгийг борлуулахаар олон нийтэд мэдээлэл хүргэж байна. Бүтээн байгуулалтын ажил үргэлжилж буй болон дуусаагүй барилгуудын тухай мэдээллийг цаг тухай бүрд танилцуулан хүргэж ажиллах болно.
ӨМЧЛӨХ БУСАД ҮЛ ХӨДЛӨХ ХӨРӨНГИЙН МЭДЭЭЛЭЛ
Монгол Улсын Хөгжлийн банкны өмчлөл эзэмшилд шилжин ирсэн 2023 оны 06 дугаар сарын 15 өдрөөс зарж борлуулахаар олон нийтэд хүргэж буй ҮХХ-ийг танилцуулж байна. Үүнд:
Хөгжлийн банк нь 2023 онд төлөх бондуудын төлбөрийг барагдуулахын тулд богино хугацаанд хөрвөх чадвартай нөөц хөрөнгө бүрдүүлэх нь чухал байна. Тиймээс өмчлөлд шилжсэн үл хөдлөх хөрөнгүүдийг шилжүүлж авсан үнэ дээр тухайн хөрөнгийг эзэмшихтэй холбоотой гарсан болон худалдан борлуулахтай холбоотой гарах зардлуудыг нэмж худалдах суурь үнийг тогтоосон бөгөөд 3 сар тутамд шинэчлэн тогтоох юм.
Хөгжлийн банкны зүгээс 2023 оны 06 дугаар сарын 03-ны өдрөөс эхлэн худалдан борлуулах үл хөдлөх хөрөнгийн байршил тус бүрд газар дээр нь байрлан танилцуулах бөгөөд худалдан борлуулах үйл ажиллагааг олон нийтэд нээлттэй шилэн ажиллахаар төлөвлөж байна.
Худалдан борлуулах үл хөдлөх эд хөрөнгөтэй холбоотой дэлгэрэнгүй мэдээллийг банкны цахим хуудасны ҮХХ-ийн мэдээлэл цэснээс энд дарж авна уу.
Хөгжлийн банкнаас нээлттэй худалдан борлуулах үл хөдлөх эд хөрөнгийн зарлал
Худалдан борлуулах үл хөдлөх эд хөрөнгөтэй холбоотой дэлгэрэнгүй мэдээллийг банкны цахим хуудас болох энд дарж авна уу.
- ХУДАЛДАХ ХӨРӨНГИЙН ТАНИЛЦУУЛГА
| № | Хөрөнгийн тодорхойлолт, хаяг байршил | м.кв үнэ | Худалдах үнэ /₮/* |
| 1 | Хан-Уул дүүргийн 4 дүгээр хороо, Нүхтийн ам 19/09 тоот хаягт байршилтай, 437.2 м.кв талбай бүхий 3 давхар амины орон сууц (80 хувийн гүйцэтгэлтэй), 2 авто зогсоолын хамт | 1,984,550 | 867,645,150 |
| 2 | Баянзүрх дүүргийн 17 дугаар хороо, 59б байр 3 давхар 59-б-2 тоот хаягт байрлалтай 405.23 м.кв талбайтай, үйлчилгээний зориулалттай (98 хувийн гүйцэтгэлтэй) үл хөдлөх эд хөрөнгө | 1,467,174 | 594,542,919 |
| 3 | Баянзүрх дүүргийн 17 дугаар хороо, 59а байр 3 давхар 4 тоот хаягт байрлалтай 30 м.кв талбайтай, үйлчилгээний зориулалттай (98 хувийн гүйцэтгэлтэй) үл хөдлөх эд хөрөнгө | 1,483,740 | 44,512,209 |
| 4 | Баянзүрх дүүргийн 17 дугаар хороо, 59а байр 3 давхар 8 тоот хаягт байрлалтай 36 м.кв талбайтай, үйлчилгээний зориулалттай (98 хувийн гүйцэтгэлтэй) үл хөдлөх эд хөрөнгө | 1,480,759 | 53,307,306 |
| 5 | Сүхбаатар дүүргийн 6-р хороо, Бага тойруу 48-р байр 1401,1402 тоот хаягт байршилтай 525 м.кв талбай бүхий үйлчилгээний зориулалттай үл хөдлөх эд хөрөнгө | 2,279,563 | 1,196,770,700 |
| 6 | Баянзүрх дүүргийн 1-р хороо, Их тойруу 93, Барилга Мега Стор худалдааны төв, В1 давхар | 1,606,621 | 1,437,958,095 |
| 7 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 3 тоот хаягт байршилтай 68.37 м.кв бүхий орон сууцны зориулалттай үл хөдлөх эд хөрөнгө | 2,211,731 | 151,216,064 |
| 8 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 6 тоот хаягт байршилтай 68.64 м.кв бүхий орон сууцны зориулалттай үл хөдлөх эд хөрөнгө | 2,179,597 | 149,607,523 |
| 9 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 7 тоот хаягт байршилтай 67.90 м.кв бүхий орон сууцны зориулалттай үл хөдлөх эд хөрөнгө | 2,211,788 | 150,180,428 |
| 10 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 10 тоот хаягт байршилтай 67.78 м.кв бүхий орон сууцны зориулалттай үл хөдлөх эд хөрөнгө | 2,211,803 | 149,916,010 |
| 11 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 11 тоот хаягт байршилтай 67.24 м.кв бүхий орон сууцны зориулалттай үл хөдлөх эд хөрөнгө | 2,211,870 | 148,726,130 |
| 12 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 14 тоот хаягт байршилтай 67.79 м.кв бүхий орон сууцны зориулалттай үл хөдлөх эд хөрөнгө | 2,211,802 | 149,938,045 |
| 13 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 15 тоот хаягт байршилтай 67.57 м.кв бүхий орон сууцны зориулалттай үл хөдлөх эд хөрөнгө | 2,211,829 | 149,453,279 |
| 14 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 17 тоот хаягт байршилтай 67.66 м.кв бүхий орон сууцны зориулалттай үл хөдлөх эд хөрөнгө | 2,211,818 | 149,651,593 |
| 15 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 23 тоот хаягт байршилтай 67.90 м.кв бүхий орон сууцны зориулалттай үл хөдлөх эд хөрөнгө | 2,211,788 | 150,180,428 |
| 16 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 26 тоот хаягт байршилтай 68.21 м.кв бүхий орон сууцны зориулалттай үл хөдлөх эд хөрөнгө | 2,211,751 | 150,863,507 |
| 17 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 27 тоот хаягт байршилтай 67.66 м.кв бүхий орон сууцны зориулалттай үл хөдлөх эд хөрөнгө | 2,211,818 | 149,651,593 |
| 18 | Хан-Уул дүүргийн, 10-р хороо, Буянт Ухаа, Архивчдын гудамж, 447 байр 30 тоот хаягт байршилтай 67.72 м.кв бүхий орон сууцны зориулалттай үл хөдлөх эд хөрөнгө | 2,211,810 | 149,783,801 |
*Худалдан борлуулах үнийг 3 сар тутам шинэчлэн тогтооно.
- ХӨРӨНГӨ ХУДАЛДАН АВАХ САНАЛ ИРҮҮЛЭХ
Дээрх жагсаалтад бүртгэлтэй үл хөдлөх эд хөрөнгөөс сонирхож буй үл хөдлөх хөрөнгийг худалдан авах хүсэлтийг Монгол Улсын Хөгжлийн Банкны цахим хуудас болох https://www.dbm.mn -аар хүлээн авах бөгөөд санал авах хугацаа 2023 оны 06 дугаар сарын 15-ны өдрийн 10:00 цагаас эхэлнэ.
- ХУДАЛДАХ ХӨРӨНГИЙН ТАЛААР МЭДЭЭЛЭЛ АВАХ, ГАЗАР ДЭЭР ОЧИЖ ҮЗЭХ
Худалдан борлуулахаар нийтэд зарласан хөрөнгийг Монгол Улсын Хөгжлийн банкны цахим хуудсаар дамжуулан мэдээлэл авах, эсвэл газар дээр очиж үзэх тохиолдолд 2023 оны 06 дугаар сарын 03-ны өдрөөс 2023 оны 06 дугаар сарын 14-ны өдрийг дуустал хугацаанд тухайн байрлалд танилцуулах үзүүлэх боломжтой бөгөөд хөрөнгийн талаарх дэлгэрэнгүй мэдээллийг 8502-0513, 8551-0513 утсаар лавлана уу.
- ХУДАЛДАН АВАХ НӨХЦӨЛ
Худалдан авах хүсэлт гаргагчийн ирүүлсэн саналыг 2023 оны 06 дугаар сарын 20-ны өдрийн 14:00 цагт цахим хуудсанд ирүүлсэн саналуудыг нэгтгэн шаардлага хангасан худалдан авагчтай холбогдож, гэрээ байгуулах бөгөөд ашиглалтад орсон худалдан авах үл хөдлөх эд хөрөнгийн үнийг ажлын 3 хоногийн дотор, дутуу гүйцэтгэлтэй үл хөдлөх хөрөнгийн үнийг (банктай хэсэгчлэн төлөх гэрээ байгуулсан) ажлын 14 хоногийн дотор төлөх бөгөөд төлөөгүй тохиолдолд дараагийн хүнтэй гэрээ байгуулах байдлаар банк ажиллана.
Хүсэлт гаргагчийн санхүүгийн чадавхаа нотолсон баримтад тулгуурлан үнэлэх дараалал: Үүнд:
- Бэлэн төлөлт (Дансны хуулга, бусад нотлох баримт)
- Банкны зээлийн шийдвэр (банкны тодорхойлолт, зээлийн гэрээ)
- Хэсэгчилж төлөх санал гаргах (Дуусаагүй барилгын хувьд зөвхөн гаргах бөгөөд бизнесийн үйл ажиллагаа, эргэн төлөлтийг нотолсон баримт)
Жич: Дээрх дарааллын дагуу хүсэлт гаргагчийн саналыг үнэлэх бөгөөд цахим системээр хамгийн түрүүнд ирсэн саналыг шалгаруулж, худалдан авах саналыг баталгаажуулна. Мөн хүсэлт гаргагч нь хэд хэдэн үл хөдлөх эд хөрөнгөд саналаа өгөх боломжтой.
МОНГОЛ УЛСЫН ХӨГЖЛИЙН БАНК