Улаанбаатар-Дархан чиглэлийн нэг урсгал, хоёр эгнээ хатуу хучилттай авто замын хөдөлгөөнийг 2022 оны аравдугаар сарын 30-ны ням гаригт нээлээ.
Улаанбаатар-Дархан чиглэлийн авто замын бүтээн байгуулалтын ажлын явцын талаар Зам, тээврийн хөгжлийн сайд С.Бямбацогт өнгөрсөн лхагва гаригийн /2022 оны аравдугаар сарын 26/ хуралдаанд танилцуулга хийсэн. Энэ үеэр Ерөнхий сайд Л.Оюун-Эрдэнэ Дарханы замын тендер сонгон шалгаруулалттай холбогдох албан тушаалтнуудыг шалгах ажиллагааг үргэлжлүүлж, хариуцлага алдсан албан тушаалтан, компаниудад хариуцлага тооцох ёстойг сануулсан. Улаанбаатар-Дарханы чиглэлийн замын бүтээн байгуулалт эхэлснээс хойшхи хугацаанд тус зам дээр олон осол гарсан. Зам хугацаандаа ашиглалтад орсон бол, төрийн албан тушаалтнууд хариуцлагатай хандаж ажилласан бол олон арван хүн осолдож, амь насаа алдаж, эрүүл мэнд, эд хөрөнгийн хохирол амсахгүй, улс орон эдийн засгийн алдагдал хүлээхгүй байсан. Тиймээс буруутай этгээдүүдэд заавал хариуцлага оноох ёстой. Ард иргэдийг удаан хугацааны турш бухимдуулдаг, эрүүл мэнд, эд хөрөнгөөр нь хохироодог, заавал Ерөнхий сайд ирж ажиллаж, үүрэг даалгавар өгдөг байдал дахиж давтагдах ёсгүйг анхааруулаад Улаанбаатар-Дархан чиглэлийн автозамыг 2023 оны арваннэгдүгээр сард багтааж хоёр урсгал, дөрвөн эгнээгээр нээж, ашиглалтад оруулахыг үүрэг болгосон.
Өвлийн улиралд замын хөдөлгөөний аюулгүй байдлыг хангаж, саадгүй зорчих бүх талын арга хэмжээ авахыг сануулсан. Мөн Европын сэргээн босголт, хөгжлийн банк болон Азийн хөгжлийн банкны зээлийн хүрээнд өнгөн хучилтын ажил хийх гүйцэтгэгчийг сонгох шалгаруулалтыг яаралтай зарлан, дүгнэх, 2023 оны хоёрдугаар сард багтаан гэрээнд гарын үсэг зурж, бэлтгэл ажлыг хангуулах, гүйцэтгэгч нарын гэрээг дүгнэх, ажлын хоцрогдол ихтэй гүйцэтгэгчдийн гэрээнд шаардлагатай нэмэлт өөрчлөлт оруулах, цаашид ажиллах боломжгүй гүйцэтгэгчдийн гэрээг цуцлах хүртэл арга хэмжээ авахыг анхааруулсан юм.
2021 оны тавдугаар сар
2022 оны зургадугаар сар
С.Бямбацогт: Дарханы зам олон жилийн хугацаанд баригдаж, ард иргэд, ААН-үүдэд хүндрэл учруулж байсанд уучлалт хүсье
Улаанбаатар-Дархан чиглэлийн 204.11 км замыг хөдөлгөөнийг аравдугаар сарын 30-ны Ням гарагт нээсэн.
Энэ талаар өнөөдөр Зам, тээврийн хөгжлийн сайд С.Бямбацогт мэдээлэл хийж, иргэд, аж ахуйн нэгжүүдээс уучлалт гуйв.
Тэрбээр "Монгол Улсын нийгэм, эдийн засаг, зорчигч болон ачаа тээврийн гол судас болсон, Монгол Улс ОХУ-ыг холбосон, импортын ачааны дийлэнх хэсгийг тээвэрлэдэг Дарханы зам олон жилийн хугацаанд баригдаж, энэ хугацаанд ард иргэд, ААН байгууллагуудад хүндрэл учруулж байсанд уучлалт хүсье.
Монгол Улсын Засгийн газар, Ерөнхий сайдаас өгсөн үүрэг чиглэлийн дагуу холбогдох яамд, байгууллагууд анхаарал тавьж ажилласны дүнд Дархан-Улаанбаатар чиглэлийн нэг урсгал, хоёр эгнээ зам хөдөлгөөнөө нээж байна" гээд өнгөрсөн хугацаанд хатуу боловч үнэн үгээр шүүмжилж, ажиллах боломж олгож байсан иргэд, мөн энэ замыг чанартай богино хугацаанд хийхээр хичээж ирсэн нийт замчдадаа баярлалаа гэдгийг хэллээ.
Ирэх жил хоёр урсгал, дөрвөн эгнээ зам бүрэн нээгдэнэ. Энэ хүртэл замын хөдөлгөөний аюулгүй байдлыг хангаж, дүрмээ баримталж, тэмдэг тэмдэглэгээг дагаж, осолгүй зорчихыг иргэд тээвэрчдэдээ уриалж байгаагаа С.Бямбацогт хэлэв.