“Улаанбаатар-2022” бөхийн төрлүүдийн Азийн аварга шалгаруулах тэмцээний эхний өдөр буюу өчигдөр /2022.04.19/ сонгомол бөхийн 55, 63, 77, 87, 130 кг жингийн барилдаан болж аваргуудаа шалгаруулав.
Энэ өдрийн барилдаанд Киргизийн баг 2 алт, 1 хүрэл, Казахстаны баг 1 алт, 3 мөнгө, 1 хүрэл, Ираны баг 1 алт, 2 хүрэл, Японы бөхчүүд 1 алт, 1 хүрэл, Узбекистаны баг 1 мөнгө, 2 хүрэл, БНСУ-ын багаас 1 мөнгөн мөнгө, Энэтхэгийн бөхчүүд 3 хүрэл медаль тус тус хүртлээ.
Монгол Улсаас 55 кг-д ОУХМ Мөнх-Эрдэнийн Даваабанди Энэтхэгийн Аржум Халакуритэй, 87 кг-д спортын мастер Лутбаярын Батбаяр Энэтхэгийн Сунил Кумартай хүрэл медалийн төлөө тус тус барилдаж ялагдсан юм.
Монголын бусад жингийн бөхчүүдийн хувьд, 63 кг-д Д.Балжинням Ираны Имам Хоссейн Мохаммадид 4:12-оор, 77 кг-д О.Сүлдхүү Японы Кодаи Сакүрабад 0:9-өөр, 130 кг-д Д.Хүдэрбулга Японы Арата Сонодад 1:7-гоор ялагдсанаар тэмцээнээ дуусгасан.
"Улаанбаатар-2022" Ази тивийн аварга шалгаруулах тэмцээний 2 дахь өдөр буюу өнөөдөр сонгомол бөхийн 60, 67, 72, 83, 97 кг жингийн барилдаанууд болж, аваргаа шалгаруулна.
