Эрдэнэт үйлдвэр нийгмийн хариуцлагынхаа хүрээнд бүтээн байгуулж буй олон ажлын нэг нь Соёл, спортын “Эрдэнэт” цогцолборын барилга юм. Цар тахлын нөхцөл байдлаас үүдэн хил гааль дээр ачаа эргэлт саатсанаас барилгын ажил удааширсан ч сүүлийн үед эрчтэй явна. Уг барилгын ерөнхий гүйцэтгэгчээр Барилга засварын цех ажиллаж байгаа бөгөөд өнөөдөр дотоод өрлөгийн ажлыг 75 хүний бүрэлдэхүүнтэй гүйцэтгэж байна. Одоогоор туслах дамнуургын блокын ажил 90 хувьтай, тоосго өрлөг 50 хувьтай явна.
Харин дээврийн ажлыг гаднын компани гүйцэтгэж байгаа бөгөөд тавдугаар сарын 15-нд хүлээлгэн өгөх ажээ. Харин дөрөвдүгээр сарын нэгэн гэхэд бүх өрлөгийг дуусгаад засал чимэглэлийн ажилдаа орно, гэж Барилга засварын цехийн ахлах мастер А.Гантөмөр мэдээллээ.
Эрдэнэт үйлдвэрийн дэргэдэх Соёл, спортын “Эрдэнэт” цогцолбор нь 2000 хүний суудалтай, зоорийн давхартайгаа таван давхар бүхий үзвэр, үйлчилгээ, үзэсгэлэнгийн танхим, бэлтгэлийн заал, албан тасалгаа, саун душ, лоунж зэргээс бүрдсэн байгууламж юм. Монголд томоохонд тооцогдох энэхүү барилгыг тус цехийн хамт олон наадмын өмнө ашиглалтад оруулахаар шамдаж байна.
М.ОДГЭРЭЛ
ФОТО: Б.БАТТӨГС
ФОТО: Б.БАТТӨГС