/CNBC/. Дэлхийн эрүүл мэндийн байгууллага /ДЭМБ/ коронавирусний “омикрон” хувилбарын хурдан халдварладаг “BA.2” дэд хувилбарын тархалт дэлхий даяар нэмэгдэх төлөвтэй байгаа талаар мэдээлжээ. Гэхдээ “омикрон”-ы өмнөх хувилбараар халдварласан хүмүүс уг дэд хувилбараар дахин халдварлах эсэх нь одоогоор тодорхойгүй байгаа ажээ.
Мягмар гарагт ДЭМБ-ын “COVID-19”-ийн асуудал хариуцсан дарга Мария Ван Керховегийн мэдээлснээр, тус байгууллага “омикрон”-ы дөрвөн өөр дэд хувилбарыг судалж байгаа бөгөөд “BA.2” дэд хувилбар нь одоогоор давамгайлж буй “BA.1”-ээс илүү халдвартай тул улам өргөн хүрээгээр тархаж магадгүй байна.
ДЭМБ-ын хувьд одоо “омикрон” хувилбарын тархалтын улмаас өвчлөл эрс нэмэгдсэний дараа хурдацтай буурсан орнуудад “BA.2” дэд хувилбарын тархалтын улмаас өвчлөл нэмэгдэх эсэхийг судалж байна гэж М.Керхове тус байгууллагын нийгмийн сүлжээний платформуудаар шууд дамжуулсан хурлын үеэр асуултад хариулах үеэрээ хэлжээ.
Одоогийн байдлаар дэд хувилбарууд өвчтөнүүдийг өөр хэлбэрээр өвчлүүлж байгаа гэх мэдээлэл байхгүй бөгөөд холбогдох судалгааг үргэлжлүүлэн хийж байгаа юм байна. “Омикрон”-ыг “альфа”, “дельта” хувилбаруудтай харьцуулахад хүндээр өвчлүүлдэггүй боловч хурдан халдварладаг.
Данийн судлаачдын тогтоосноор, “BA.2” нь “BA.1”-ээсээ 1.5 дахин хурдан халдварладаг бөгөөд вакцинд хамрагдсан, нэмэлт тунг тариулсан хүмүүсийн халдвар авах магадлалыг нэмэгдүүлж байна. Гэхдээ вакцинд бүрэн хамрагдсан хүмүүсийн бусдад халдвар дамжуулах эрсдэл нь вакцин хийлгээгүй хүмүүсийнхтэй харьцуулахад бага байна.
М.Керхове “COVID-19”-ийн вакцинууд халдвар авахаас бүрэн сэргийлэхгүй ч хүндээр өвчлөх, улмаар нас барахаас өндөр хувиар хамгаалсан хэвээр байгааг онцолжээ. Мөн тэрбээр вакцинд хамрагдаж, битүү орчинд амны хаалт зүүхийг хүмүүст уриалсан байна.
ДЭМБ-ын “COVID-19”-ийн өвчлөл хариуцсан төлөөлөгч, доктор Абди Махамудын хэлснээр, өмнө нь “BA.1” дэд хувилбараар халдварласан хүмүүс “BA.2”-оор дахин халдварлах эсэх нь одоогоор тодорхойгүй байна. Энэ талаарх мэдээлэл нь вирусний тархах чадварын судалгаанд ихээхэн ач холбогдолтой юм.
Их Британид хийсэн нэгэн судалгаанд хамрагдсан “омикрон” хувилбараар халдварласан хүмүүсийн гуравны хоёр нь урьд нь “COVID-19”-өөр халдварлаж байсан гэдгээ хэлсэн байна. Өнөөдрийн байдлаар “BA.2” дэд хувилбар АНУ-ын ихэнх муж улсад илрээд байгаа ч улсын хэмжээнд 460 тохиолдол бүртгэгдээд байна гэж “COVID-19”-ийн хувилбаруудын мэдээллийг агуулдаг олон улсын мэдээллийн сангаас мэдээлжээ. ДЭМБ-ын мэдээллээр, “ВА.2” 67 улс оронд илрээд байна.