Монголын хоккейн лигийн медалийн төлөөх тоглолтууд лхагва гарагт /2021.11.24/ “Степпе арена” мөсөн ордонд явагдаж алтан медалийн эздээр “Хангарьд” баг шалгарлаа.
Эрдэнэтийн Хангарьд баг шигшээ тоглолтод “Шарын гол” багийг 6:3-аар хожсоноор Монголын хоккейн лигийн аваргын 6 дахь цомоо өргөлөө.
"Ковид-19" халдварын улмаас 2 жил завсарласан Монголын хоккейн лигийн аварга шалгаруулах тэмцээний плэй-оффын тоглолтууд 11 дүгээр сарын 21-нд эхэлж, алтан медалийн төлөө өрсөлдөх багууд тодорсон юм.
“Хангарьд” баг “Багануур” багийг 2 тоглолтод 12:3, 9:0 буулган авсан бол, шигшээд шалгарсан “Шарын гол” баг “Отгон од- Бласт” багийг 3:0, 4:3-аар тус тус ялсан.
Хүрэл медалийн төлөө “Багануур”, “Отгон од- Бласт” багууд өрсөлдөж, “Отгон од- Бласт” баг 7:6-аар хожиж, хүрэл медалийн эзэд болсон.
