Улсын төсвөөс буюу 32 тэрбум төгрөгийн өртгөөр баригдах гэж буй "Богд Зонхова" цогцолбортой холбоотой багагүй шүүмжлэл өнгөрөгч амралтын өдрүүдэд нийгмийн сүлжээнд өрнөсөн.
Цар тахлаас үүдэлтэй эдийн засгийн хүндрэлтэй үед багагүй хөрөнгөөр хөшөө барих гэж байгаа нь олон нийтийн бухимдуулсан юм. Тэгвэл Соёлын сайд Ч.Номин өрийн цахим хаягаар дамжуулан уг цогцолборт хөрөнгө зарцуулахгүй болохоо мэдэгджээ.
Тэрбээр "Түүх, шашны соёлыг дэлгэрүүлэх "Богд Зонхова" цогцолборын төсөл намайг Соёлын сайдаар томилогдохоос өмнө эхэлсэн төсөл юм.
Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно.
Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд Зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна.
Монгол Улсын хувьд түүх, соёл, шашин нь бидний оршин тогтнохтой холбоотой асуудал. Гэвч, аль ч шашинд сүсэглэх, шүтэх нь аливаа цогцолборыг барих, болихоос үл шалтгаалах дотоод итгэл үнэмшлийн асуудал тул эвийг эрхэмлэхийг та бүхнээс хичээнгүйлэн хүсье" гэжээ.
