Хүнд үйлдвэрийн тухай хуулийн төслийг УИХ-д өргөн барина

оруулсан Алсын Хараа

Засгийн газрын өнөөдрийн ээлжит хуралдаанаар Хүнд үйлдвэрийн тухай хуулийн төслийг УИХ-д өргөн барихаар шийдвэрлэсэн байна. Энэ талаар Засгийн газрын хуралдааны шийдвэрийг танилцуулах хэвлэлийн хурлын үеэр УУХҮ-ийн сайд Г.Ёндон мэдээлэв.

Монгол Улс байгалийн баялгаа хайгуулж хийж илрүүлээд, түүнийгээ олборлож экспортод шууд гаргадаг. Үүнийг өөрчилж, байгалийн баялгийн боловсруулалт, борлуулалт, хуваарилалтын асуудлыг хуульчлах шаардлагатай байгаа юм. Тиймээс өнөөдөр боловсруулалттай холбоотой асуудлыг зохицуулах Хүнд үйлдвэрийн тухай хуулийн төслийг боловсруулж, өргөн барих болсон байна. Мөн байгалийн баялгийн хуваарилалтыг Үндэсний баялгийн сангаар дамжуулан шийдвэрлэхээр болж, холбогдох хуулийн төслөө боловсруулж буйг УУХҮ-ийн сайд мэдээлсэн юм.

Мөн тэрбээр Эрдэс баялаг, эрчим хүч, дэд бүтцийн салбарын Монгол, БНХАУ-ын хамтарсан зөвлөлийн гуравдугаар хурал энэ сарын 15-нд болно гэдгийг мэдээлэв. Уг хурлын үеэр Монголын талын баримтлах удирдамжийг өнөөдрийн Засгийн газрын хуралдаанаар хэлэлцсэн байна. Монголын талаас нэн тэргүүнд Монгол Улсын Ерөнхий сайд Л.Оюун-Эрдэнэ БНХАУ-ын Төрийн зөвлөлийн Ерөнхий сайд Ли Көчянтай нарын цахим хурлын үеэр ярилцсан асуудалд төвлөрөх аж. Тодруулбал, Улаанбаатар хотыг тойрсон хурдны автозам, Баганан тулгуурт автобусны зам, Монгол Улсын өмнөд бүсийн нар, салхины эрчим хүчний нөөцийг ашиглах, Алтанбулаг-Замын-Үүдийн хурдны автозам зэрэг төслийн талаар хэлэлцэх аж. Түүнчлэн ОХУ-аас БНХАУ руу тавих байгалийн хийн хоолойг Монгол Улсын нутгаар дайруулах төслийг хэлэлцэх юм. Мөн нүүрсний экспортын хэмжээг нэмэх, хилийн боомтуудад тулгамдаж буй асуудлыг шуурхай шийдвэрлэх талаар уг хурлаар ярилцахаар төлөвлөсөн байна.

Зөвлөлийн хурлын үеэр Шивээ-Овоогийн ДЦС, Таван толгойн ДЦС, Багануур-Чойр-Цагаан суваргын цахилгана дамжуулах агаарын шугам байгуулах, Замын-Үүд, Эрээн боомтоос БНХАУ-ын далайн боомтууд руу төмөр замаар ачаа тээвэрлэхэд тарифын хөнгөлөлт үзүүлэх талаар ярилцах аж.

Үүнээс гадна УУХҮ-ийн сайд Г.Ёндон шатахууны нөөц болон үнийн өсөлтийн талаар мэдээлэл өгөв. Төрөөс шатахууны үнийг зургаан сарын хугацаанд барьж ирсэн бол цаашид үнэ чөлөөлөх бодлогыг баримтлана гэв.

Тэрбээр “Шатахууны нөөц сэргэж байна. ОХУ-аас ирсэн 1044 тонн бензин монголын газар нутагт орж ирсэн байна. Мөн ОХУ-аас дахин 724 тонн шатахуун ирж байгаа.

Хөх хотоос ачигдсан 2500 тонн шатахуун Эрээн дээр ирсэн байна.

Саяхан болсон ОПЕК-ийн гишүүн орнуудын хуралдаанаар олборлолтыг нэмэгдүүлэх шийдвэр гараагүй, үүнийг дагаад үнэ нэмэгдсэн.

Өчигдрийн байдлаар нэг баррель газрын тосны үнэ 84 ам.доллар болчихсон байна. Үүнийг дагаад манайд үнэ нэмэгдэх урьдчилсан нөхцлийг бий болгоод байна.

Цар тахлын улмаас яах аргагүй төр үнийг зургаан сар барьсан. Энэ хугацаанд ААН-үүд 70 гаруй тэрбум төгрөгийн алдагдал хүлээсэн.  Харин цаашид шатахууны үнийн өсөлт, бууралтад оролцоод байж болохгүй. Үнэ чөлөөлөх ажлыг аажмаар эхлэх шаардлага гарч ирж байна” гэв.

Сэтгэгдэл бичих