Шатахуун импортлогч зарим компани газрын тосны бүтээгдэхүүний хязгаарлалт хийж, АИ-92 автобензиний хомстол үүсч болзошгүй нөхцөл байдал үүссэн мэт ташаа мэдээлэл өчигдөр буюу 2021 оны 10 дугаар сарын 05-ны өдөр олон нийтийн сүлжээгээр цацагдсан. Үүний улмаас шатахуун түгээх станцуудад зохиомол хомстол үүсч, иргэдийг бухимдуулж байна.
Газрын тосны бүтээгдэхүүн, АИ-92 автобензиний нийлүүлэлт хэвийн буй бөгөөд 9 дүгээр сарын 27-оос 10 дугаар сарын 02-ны өдрүүдэд ОХУ болон БНХАУ-аас нийт 11,704 тонн АИ-92 автобензин импортолсон. Мөн импортлогч компаниуд 10 дугаар сард ОХУ-аас нийт 54,880 тонн АИ-92 автобензин, БНХАУ-аас 12,700 тонн АИ-92, АИ-95 автобензин худалдан авах захиалга өгч баталгаажуулаад байгаа юм.
Өнөөдөр шатахуун импортлогч компаниуд өөрийн албан ёсны цахим хуудсаар дамжуулан бензиний нөөц хэвийн буйг мэдэгдэж, хязгаарлалт хийгээгүй болохыг онцолсон байна.
Мөн шатахууны зохиомол хомстол үүсгэх эхлэлийг цахим орчинд анх тараасан "Сод Монгол групп" ХХК-д УУХҮЯ болон АМГТГ-аас хариуцлага тооцох ёстой хэмээн ШӨХТГ-ын дарга Б.Бат-Эрдэнэ өөрийн цахим хуудсаараа дамжуулж мэдэгдээд байна. Тэрбээр, "Сод Монгол компанийн энэ үйлдэлд хариуцлага тооцохыг Ашигт малтмал, газрын тосны газар Уул уурхай хүнд үйлдвэрийн яам/Ministry of Mining and Heavy Industry -аас хүсье.
Ямар үндэслэлээр ийнхүү олон нийтийн дунд төөрөгдөл, ачаалал, хомсдол тасалдал үүсгэх хэмжээнд үйл ажиллагаа явуулсаныг Шударга өрсөлдөөн, хэрэглэгчийн төлөө газар -аас шалгана." хэмээжээ.
