Токио хотноо болж буй мэргэжлийн сумо бөхийн хаврын тэмцээний 10 дахь өдөр Сэкиваке Тэрүнофүжи Г.Ган-Эрдэнэ, Шиманоүми /М-3/-тэй учраа таарч, түүнд цүкиотоши мэхээр унаж 7 даваа, 3 унаатай боллоо.
Харү башёгийн 10 дахь өдрийн байдлаар Комүсүби Такаясү 9 даваа, нэг унаатай ганцаараа тэргүүлж байгаа бол өнөөдөр өрсөлдөгч бөхдөө ойчсон Сэкиваке Тэрүнофүжи Г.Ган-Эрдэнэ, Чиёонокүни /М-9/ нар Озэки Асанояама, Тобизарюү /М-8/, Ишиүра /Жүрёо-2/ нарын адил 3 унаа, 7 даваатай болж Такаясүгээс 2 даваагаар дутуу болов.
Энэ өдөр Тамаваши Б.Мөнх-Оргил /М-6/, Кирибаяама Б.Лхагвасүрэн /М-4/-д сотогаке мэхээр унаж 5 даваа, 5 унаатай болсон бол Кирибаяама 4 даваа, 6 унаатай боллоо.
Харин Ичиножёо А.Ичинноров /М-6/, Котоновака /М-8/-тай барилдаж, түүнийг хатакикоми мэхээр хаяж, 6 даваа, 4 унаатай явна.
Энэ өдрийн барилдаанд Хошёорюү С.Бямбасүрэн /М-9/, Кайсэй/М-16/-тэй учраа таарч, түүнийг шитатэнаге мэхээр хаяж, 6 даваа, 4 унаатай боллоо. Чиёошома Г.Мөнхсайхан /М-13/ энэ өдөр Тобизарюү /М-8/-тай барилдаж, түүнд коматасүкүи мэхээр унаснаар 5 даваа, 5 унаатай болов.
Энэ башёд хүч үзэж байгаа гурван озэки цолтны нэг Такакэйшо, Комүсүби Такаясүтэй барилдаж уватэнаге мэхээр унаж 6 даваа, 4 унаатай боллоо. Харин Озэки Асанояама, Сэкиваке Таканошог сүкүинаге мэхээр хаяж, 7 даваатай башёг үргэлжлүүлж байна. Озэки Шодай энэ өдөр Мёогирюү /М-4/-г хатасүкаши мэхээр унагаж, тэд адилхан 5 даваа, 5 унаатай болов.
Маргааш Сэкиваке Тэрүнофүжи Г.Ган-Эрдэнэ, Сэкиваке Таканошотой барилдах бол Кирибаяама Б.Лхагвасүрэн /М-4/, Озэки Такакэйшотой барилдана. Харин Тамаваши Б.Мөнх-Оргил /М-6/, Вакатакакаге /М-2/-тэй учраа таарсан бол Ичиножёо А.Ичинноров, Мэйсей /М-2/-тэй, Чиёошома Г.Мөнхсайхан /М-13/, Хиденоүми/М-15/-тэй, Хошёорюү С.Бямбасүрэн /М-9/, Окиноүми /М-5/-тэй тус тус хүч үзэхээр болжээ.