Улс төрийн ууган хүчин Монгол Ардын намын 100 жилийн ойн баярын өдрөөр Нийслэлийн Засаг дарга бөгөөд Улаанбаатар хотын захирагч, Нийслэлийн МАН-ын дарга Д.Сумъяабазар 100 насны төрсөн өдөр нь тохиож буй өндөр настан, МАН-ын ахмад зүтгэлтэн Жүгдэрийн Цэрэн гуайд баяр хүргэж, МАН-ын 100 жилийн ойн медалиар шагнав.
Засаг дарга Д.Сумъяабазар “1921 оны Ардын хувьсгал бол өнөөгийн Монгол Улсын суурийг бий болгосон. Тэр үеийн ахмадуудын эрэмгий зориг, эрч хүч, ухаан энэ нийгмийг бидэнд үлдээсэн. Нийслэлийн МАН-ын даргын хувиар намын ахмад зүтгэлтэн Ж.Цэрэн гуай танд төрсөн өдрийн баярын мэнд хүргэж, эрүүл энхийг хүсье. Мөн Монгол Ардын намын 100 жилийн ойн баярын мэнд хүргэе” гэлээ.
Ж.Цэрэн нь 1921 оны гуравдугаар сарын 1-нд Булган аймгийн Тэшиг суманд төрсөн. Түүний аав Жүгдэр нь Булган аймгийн Түшиг сумын анхны нэгдлийн даргаар ажиллаж байжээ. Ж.Цэрэн гуай “МАН-ын 100 жилийн ойн баярын мэндийг намын бүх гишүүндээ хүргэе” гэлээ.