2026 оны эхний хагас жилийн урьдчилсан гүйцэтгэлээр манай улсын нэгдсэн төсвийн нийт орлого, тусламжийн хэмжээ 16.8 их наяд төгрөгт хүрч, өмнөх оны мөн үеэс 2.8 их наяд төгрөг буюу 20.1 хувиар өсөв. Тэнцвэржүүлсэн орлого, тусламж 14.6 их наяд төгрөг болж, 1.4 их наяд төгрөг буюу 10.7 хувиар нэмэгдсэн байна.
Татварын орлого 13.4 их наяд төгрөгт хүрч, өмнөх оны мөн үеэс 10.3 хувиар өсжээ. Татварын нийт орлогын 29.9 хувийг орлогын албан татвар, 24.0 хувийг нэмэгдсэн өртгийн албан татвар, 22.2 хувийг нийгмийн даатгалын орлого бүрдүүлсэн байна.
Улсын нэгдсэн төсвийн зарлага, эргэж төлөгдөх цэвэр зээл 16.8 их наяд төгрөг болж, өмнөх оны мөн үеэс 2.8 их наяд төгрөг буюу 20.0 хувиар нэмэгдэв. Улмаар төсвийн тэнцвэржүүлсэн тэнцэл 2.1 их наяд төгрөгийн алдагдалтай гарч, алдагдлын хэмжээ өмнөх оны мөн үеэс 2.8 дахин нэмэгджээ.
Зарлагын өсөлтөд хөрөнгийн зардал 1.0 их наяд төгрөг буюу 58.2 хувиар, бараа, үйлчилгээний зардал 1.0 их наяд төгрөг буюу 20.0 хувиар, урсгал шилжүүлэг 529.8 тэрбум төгрөг буюу 8.9 хувиар өссөн нь голлон нөлөөлсөн байна.
Төсвийн орлого хоёр оронтой хувиар нэмэгдсэн ч зарлагын өсөлт өндөр түвшинд хадгалагдсанаар төсвийн алдагдал өмнөх оны мөн үеэс тэлжээ.
Эх сурвалж: Үндэсний статистикийн хороо