Хүүхдийн мөнгийг нэмэгдүүлсэн шийдвэрийг үргэлжлүүлэх эсэхийг төсвийн ачаалалтай уялдуулж гаргана

Сангийн сайд Б.Жавхлан Засгийн газрын өнөөдрийн хуралдаанаас гарсан шийдвэрүүдийг танилцуулж мэдээлэл хийх үеэрээ төсвийн тодотгол хийх нөхцөл бүрдсэн эсэх талаар сэтгүүлчийн асуултад хариуллаа.  Тэрбээр "Төсвийн тодотголыг хуулийн дагуу л хийнэ. Хуульд тодотгол хийх таван нөхцөл байдаг. Одоогоор төсвийн тодотгол хийх эдийн засгийн зайлшгүй шаардлага, нөхцөл бүрдээгүй байна.

Долдугаар сарын 1-нд үйлчлэл нь дуусаж байгаа 6-8 төрлийн эдийн засгийн арга хэмжээ бий. Тодруулбал, дулаан, цахилгаан, усны төлбөр тэглэсэн, хүүхдийн мөнгийг нэмэгдүүлсэн, олон төрлийн татварын хөнгөлөлт, торгууль алдангийн чөлөөлөлт, зээл хойшлуулсан арга хэмжээнүүдийн үйлчлэл дуусаж байгаа. Эдгээрийг цааш үргэлжлүүлэх үү, алийг нь цааш үргэлжүүлэх вэ гэдгээс шалтгаалж төсөвт тодотгол хийх үгүй нь эцсийн байдлаар шийдэгдэнэ.

Цаашдаа хүүхдийн мөнгийг долдугаар сарын 1-нээс зогсоох уу эсвэл төсөв ямар хэмжээний ачаалал аваад үргэлжүүлэх боломжтой вэ гэдэг шийдвэрийг ойрын хугацаанд гаргана. Сүүлийн хагас жилийн эдийн засаг, төсвийн нөхцөл байдлаа зөв тооцоолох ёстой. Төсөв дааж авах боломжийн хэрээр шийдвэрийг гаргана. Урьдчилсан байдлаар дулаан, цахилгаан, усны төлбөр тэглэсэн шийдвэрийн үйлчлэлийг долдугаар сарын 1-нд дуусгах, харин хүүхдийн мөнгөөр дамжуулж өрхийн амжиргааг дэмжиж байгаа учраас цаашид төсөв ямар хэмжээнд энэ ачааллыг даах вэ гэдэгтэй уялдуулж шийдвэрээ гаргана.

Ер нь цаашдаа олон давхардсан байгаа оноогүй халамжаас татгалзах бодлого барьж байгаа ч цар тахлын үед энэ бодлогын шилжилтийг огцом хийх боломжгүй байна" хэмээн хариуллаа.

Тавдугаар сарын 31-ний байдлаар төсвийн орлого 98 хувийн гүйцэтгэлтэй гарсан гэдгийг Сангийн сайд Б.Жавхлан энэ үеэр мөн мэдээллээ.

Үргэлжлүүлэн тэрбээр "Энэ тоо бол өнөөгийн нөхцөлд чамлахааргүй дүн бөгөөд 2020 оны мөн үетэй харьцуулахад нэмэгдсэн.  Энэ жилийн хувьд экспортын гол түүхий эдүүдийн үнэ бидний төсөөллөөс таатай байна.  Оны эхний таван сарын байдлаар и-баримт системд бүртгэгдсэн борлуулалтын нийт дүн 39.5 их наяд төгрөг байгаа нь 2020 оны мөн үетэй харьцуулахад 25 хувийн өсөлттэй дүн. Борлуулалтын орлогыг салбар бүрээр харвал жигд өсөлттэй байгаа.

Засгийн газраас хэрэгжүүлж байгаа цогц хөтөлбөр тэр дундаа гурван төрлийн зээл эдийн засгийн үзүүлэлтүүд өсөлттэй гарахад нөлөөлсөн. Хэрвээ 10 их наядын хөтөлбөр хэрэгжээгүй, гурван төрлийн зээл гараагүй бол банкны зээлийн гаралт буурч байгаа. Зээлийн хөтөлбөр эдийн засгаа дэмжих, ажлын байрыг хадгалах зорилготой бөгөөд халамж, тэтгэмж биш гэдгийг онцолж хэлмээр байна.

Эдийн засгийн сайн үр дүнгүүд их үнэтэй олдож байгаа. Цар тахлын үед иргэдийн амь нас, эрүүл мэндээс давсан эдийн засаг гэж байж болохгүй. Бид аль болох зөв тэнцвэр олсон шийдвэрүүдээ хадгалаад явах хэрэгтэй. Хатуу хөл хорио тавих хэмжээний эрсдэлд хүрэхгүйгээр тал талаасаа хичээгээд явах ёстой.

Эдийн засаг ерөнхий дүнгээрээ өсөлттэй байгаа ч түр зуурын шок үүсэж байна. Өдөртөө, долоо хоногтоо хилээр ороод ирдэг байсан хүнс болон өргөн хэрэглээний бараанууд саатсанаас үүдэн шок үүсэж байгаа. Хилийн боомтууд болон тухайн бүсэд хэрэгжиж байгаа хязгаарлалтуудаас үүдэн тээврийн тоо цөөрөх, үнэ өсөх нөхцөл бүрдэж байна. Үүн дээр зохицуулалтын хариу арга хэмжээг Засгийн газраас аваад явах ёстой" гэлээ.