Японд коронавирусний гурав дахь эмэнд хэрэглэх зөвшөөрөл олгожээ

оруулсан Алсын Хараа

Японы Эрүүл мэндийн яам ревматоид артрит буюу үе мөчний архаг үрэвслийн эм болох барикитинибийг “COVID-19”-өөр халдварласан өвчтөнүүдийн эмчилгээнд хэрэглэхийг зөвшөөрчээ.

Ингэснээр ремдесивир, дексаметазонд зөвшөөрөл олгоод байсан тус яам коронавирусний гурав дахь эмийг бүртгэжээ. Барикитиниб нь дархлааны эмгэгээс үүдэлтэй үрэвслийг намдаадаг бөгөөд энэ эмийг ревматоид артрит болон атопийн дерматит арьсны өвчний үед хэрэглэдэг байна.

Өнгөрсөн оны 11 дүгээр сард АНУ-ын Хүнс, эмийн хяналтын газар уг эмийг вирусний эсрэг ремдесивир эмийн хамт халдвар авсан өвчтөнүүдийн эмчилгээнд яаралтай журмаар ашиглахыг зөвшөөрчээ.

Японд барикитинибийг үйлдвэрлэж, худалдаалдаг “Eli Lilly Japan” эмийн компанийн мэдээлснээр, энэ эмийг дэлхийн хэмжээнд, “COVID-19”-өөр халдварласан 200 мянга гаруй хүнд уулгасан байна. Мөн Японд ирэх оны гуравдугаар сарын эцэс гэхэд энэ эмийг 4500-6000 хүнийг эмчлэхэд ашиглана гэж найдаж байгаагаа илэрхийлжээ.

Барикитинибийг зөвхөн уушгины хатгалгааны улмаас нэмэлт хүчилтөрөгч шаардлагатай болсон өвчтөнүүдэд уулгах бөгөөд ремдесивир эмийн хамтаар өдөрт нэг удаа уух гэнэ. Энэ эмийг жирэмсэн эмэгтэйчүүдэд уулгахыг зөвшөөрөөгүй байна.

“Eli Lilly Japan” компанийн мэдээлснээр, олон улсын эмнэлзүйн туршилтаар барикитиниб, ремдесивирийг хамт уулгасан хүмүүс ремдесивирийг дангаар уусан хүмүүсээс дунджаар нэг хоногийн өмнө эдгэрч байжээ.

Сэтгэгдэл бичих