Америкийн авирагч Алекс Хоннольд Тайванийн хамгийн өндөр барилга болох “Taipei 101” рүү хамгаалалтын олс, бэхэлгээгүйгээр авирчээ. Тэрбээр 91 минутын дотор 508 метр өндөр (101 давхар) барилгын орой дээр гарсан бөгөөд түүний авиралтыг мянга мянган хүн үзжээ. Авиралтыг Netflix-ээр шууд дамжуулж, барилгын захиргаа болон хотын удирдлагын зөвшөөрлөөр зохион байгуулсан байна.

^[1]

Хоннольд барилгын нэг булангаар авирсан байна. Авиралтын хамгийн хүнд хэсэг нь уг барилгыг онцгой хэлбэртэй харагдуулдаг “хулсан хайрцаг” гэж нэрлэдэг 64 дүгээр давхар байжээ.

Барилгын орой дээр гарсныхаа дараа тэрбээр сэтгэгдлээ хуваалцахдаа “Тайбэй хотыг харах гайхалтай арга байлаа” хэмээгээд өмнө нь зөвшөөрөлгүй авирах талаар бодож байсан боловч авиралтыг нь зохион байгуулахад оролцсон хүмүүсийг хүндэтгээд энэ санаагаа орхисон гэж ярьжээ.

"Taipei 101" нь 2004 оноос 2010 он хүртэл дэлхийн хамгийн өндөр барилга байсан бөгөөд одоо Дубайд сүндэрлэж буй Бурж-Халифа барилгыг хамгийн өндөрт тооцдог. 2004 онд Тайванийн уг өндөр барилга руу “Францын хүн аалз” гэгддэг авиралтын тамирчин Ален Робер авирч байсан боловч хамгаалалтын олс ашиглаж байжээ.

Д.Жаргал

Эх сурвалж: "Монцамэ" агентлаг

/Kazinform/. Одоогоос дөрвөн жилийн өмнө буюу 2022 онд ерөнхий сайд асан Шинзо Абэг буудан хөнөөсөн этгээдэд Японы Нара хотын шүүх бүх насаар нь хорих ял оноожээ.

Тэнгисийн цэргийн хүчинд алба хашиж байсан 45 настай Тэцүя Ямагами гар хийцийн буу ашиглан сонгуулийн сурталгаагаа хийж байсан Абэгийн аминд хүрсэн гэдгээ хүлээсэн байна. Прокурорууд уг хэргийг “дайны дараах түүхэнд үзэгдээгүй хэрэг” гэж дүгнэсэн бөгөөд хэрэгтэнд бүх насаар нь хорих ял оноохыг шаардсан байна.

Киодо агентлагийн мэдээлснээр, шүүх хурлын явцад Ямагамигийн өмгөөлөгчид хэлэхдээ, хорих ял 20 жилээс хэтрэх ёсгүй, мөн Ямагами нь шашны бүлгийн хүчирхийллийн золиос болсон гэж мэдэгджээ.

Хэрэгтэн “Нэгдлийн сүм” гэдэг шашны байгууллагад ихэд өширхдөг байсан аж. Учир нь, түүний ээж уг сүмд асар их хэмжээний буюу 100 сая иен хандивласны улмаас Ямагамигийн гэр бүл үгүйрэн хоосроход хүрсэн байна. Шүүгдэгчийн ярьснаар, талийгаач Абэ “Нэгдлийн сүм”-д нөлөөтэй нэгэн байсан ажээ. Мөн Либерал-Ардчилсан намаас сонгогдсон парламентын зарим гишүүд сонгуулийн кампанит ажлаа явуулахдаа уг сүмээс дэмжлэг авдаг байсан гэдэг.

Өнөө өглөө болсон нээлттэй шүүх хуралд оролцохоор 685 хүн дараалалд зогсож байсан бөгөөд тэднээс 31 хүнийг сугалааагаар шүүхийн танхимд нэвтрүүлжээ.

Гишүүдээсээ сүрдүүлэн мөнгө авч байсан Нэгдлийн сүмийн талаарх мэдээлэл ил болсны дараа засгийн газар мөрдөн шалгалт явуулсан бөгөөд улмаар Токиогийн тойргийн шүүхээс уг сүмийг татан буулгаж, татварын хөнгөлөлт үзүүлдэг байсныг цуцлах шийдвэр гаргажээ.

Гангийн үйлдвэрлэлээр дэлхийд хоёрдугаарт ордог Энэтхэг улс коксжих нүүрсний хэрэгцээнийхээ 85 орчим хувийг импортоор хангадаг бөгөөд үүний талаас илүүг нь Австралиас авдаг. Эрэлт ирэх жилүүдэд өсөхөөр байгаа тул Засгийн газар болон гангийн үйлдвэрүүд шинэ нийлүүлэгч хайж эхэлсэн гэж эх сурвалж ярьжээ.

Далайд гарцгүй Монгол Улс нь экспортын хоёр чиглэлтэй. Нэг нь Оросоор дамжин өнгөрөх урт чиглэл бол нөгөө нь Хятадаар дамждаг.

Эх сурвалжийн хэлснээр, Монгол Улс бол Бээжингийн хувьд нүүрсний стратегийн ач холбогдолтой нийлүүлэгч, мөн дамжин өнгөрүүлэхийг хориглох эрсдэлтэй тул Хятадын нутгаар дамжих маршрутыг Энэтхэгийн эрх баригчид найдвартай гэж  үзэхгүй байгаа гэжээ. Мэдээлэл олон нийтэд ил болоогүй учир эх сурвалж нэрээ нууцлахыг хүссэн байна. Энэтхэгийн Гангийн яам энэ талаар тайлбар хүссэн имэйлд хариу өгөөгүй байна.

Энэтхэг энэ оны эхээр хийхээр төлөвлөж байсан Монголоос нүүрсний туршилтын ачилтуудыг хараахан хүлээж аваагүй байна. Тус улсын төрийн өмчит Steel Authority of India (SAIL) компани 1 тонн нүүрсийг туршилтаар авах хүсэлтээ илгээсэн талаар Reuters тавдугаар сард мэдээлж байв.

“Бид Монголын коксжих нүүрсний нийлүүлэгч нартай техникийн болон ложистикийн боломжийг тогтоох талаар тасралтгүй харилцаатай ажиллаж байна” гэж тус компани Reuters-т мэдээлжээ. Харин Монголын Аж үйлдвэр, эрдэс баялгийн яам тус агентлагийн хүсэлтэд хариу өгөөгүй байна.

Эх сурвалжийн мэдээлснээр, Энэтхэгийн коксжих нүүрсний импортын 15 орчим хувийг Орос, АНУ эзэлж байна.

Украины Ерөнхийлөгч Владимир Зеленский фронтын шугам дагуу дайныг зогсоох боломжийн талаар ярьж байгаа нь түүнийг “дипломат арга замаар шийдвэрлэхэд” чухал алхам юм гэж АНУ-д айлчилж буй ОХУ-ын Ерөнхийлөгчийн гадаадын орнуудтай хийх хөрөнгө оруулалт-эдийн засгийн хамтын ажиллагаа хариуцсан тусгай төлөөлөгч, Оросын Шууд хөрөнгө оруулалтын сангийн тэргүүн Кирилл Дмитриев CNN телевизид ярилцлага өгөхдөө мэдэгджээ.

“Орос, АНУ, Украин улсууд дипломат шийдэлд хүрэхэд нэлээд ойртсон гэж бодож байна. Ерөнхийлөгч Зеленский асуудал  фронтын шугамтай холбоотой гэдгийг хүлээн зөвшөөрснөөр чухал алхам хийлээ” хэмээн тэрбээр CNN сувгийн сэтгүүлч Жейк Таппертай ярилцах үеэрээ хэлжээ. Түүнчлэн тэрбээр Украины удирдагч өмнө нь Оросын бүх цэргийг Украины нутаг дэвсгэрээс бүрэн гаргах шаардлага тавьдаг байсан бол одоо энэ байр суурь өөрчлөгдөж буйг дурдсан байна

Үүний сацуу Украинд цэргийн ажиллагаа үргэлжилж байгаа шалтгааныг тайлбарлахдаа “аюулгүй байдлын баталгаа”, “Кремлийн байр суурийг ойлгох нь чухал” гэсэн Москвагийн мэдэгдлийг давтан хэлжээ.

АНУ-ын Ерөнхийлөгч Д.Трамп Оросын Ерөнхийлөгч В.Путинтэй Будапештэд хийхээр зарласан уулзалтаа цуцалсан талаарх сэтгүүлчийн асуултад хариулахдаа, хоёр орны удирдагчдын уулзалт болно, “гэхдээ Оростой яриа хэлэлцээ хийхгүй байхтай харьцуулахад илүү дээр учраас магадгүй хойшилж болох байх” гэжээ. Трамп мөн Оросын Ерөнхийлөгчтэй хожим уулзана гэж мэдэгдсэн юм.

Японы парламент тус улсын дараагийн ерөнхий сайдыг томиллоо. Өнөөдөр болсон санал хураалтад Такаичи Санаэ ялснаар Японы түүхэнд анх удаа эмэгтэй хүн улс орныг удирдахаар болж байна.

Эрх баригч Либерал ардчилсан намыг удирдаж буй тэрбээр Японы Инновацын намтай хамтарсан шинэ засгийн газрыг байгуулах юм. Өнөө орой эзэн хаан түүнийг томилсны дараа Т.Санаэ үүрэгт ажилдаа орно. Үүний дараа тэрбээр Ерөнхий сайдын хувиар анхны хэвлэлийн хурлыг хийх төлөвтэй байна.

Т.Санаэ Батлан ​​хамгаалахын сайдын албан тушаалд Коизүми Шинжирог сонгосон талаар NHK телевиз өмнө нь мэдээлсэн юм. К.Шинжиро нь намын даргын сонгуульд нэр дэвшсэн гол өрсөлдөгчдийнх нь нэг байв. Мөн өөр нэгэн өрсөлдөгч болох Хаяши Ёшимаса Дотоод хэрэг, харилцаа холбооны сайд болох төлөвтэй байна.

Т.Санаэ мөн Ерөнхий нарийн бичгийн дарга асан Мотэги Тошимицүг Гадаад хэргийн сайдаар томилохоор шийджээ. М.Тошимицү ч мөн түүнтэй өрсөлдөж байсан юм.  Үүний зэрэгцээ Катаяма Сацүкийг Сангийн сайдаар томилохоор шийдвэрлэсэн байна. Түүний хувьд бүс нутгийн сэргээн босголтын сайдаар ажиллаж байсан билээ.

/Reuters/. Францын шинэ Ерөнхий сайд Себастьен Лекорню шинэ засгийн газрын бүрэлдэхүүнийг танилцуулснаасаа хойш хэдхэн цагийн дараа огцорчээ. Холбоотнууд болон эсэргүүцэгчид нь засгийн газрыг нь унагана гэж сүрдүүлсний дараа тэрбээр даваа гарагт огцорсон байна.

С.Лекорнюгийн огцрох шийдвэр нь гэнэтийн бөгөөд урьд өмнө тохиолдож байгаагүй явдал байсан бөгөөд Францын улс төрийн хямрал улам гүнзгийрч байгааг харуулж байна. Түүнийг огцрох тухай мэдээ цацагдсаны дараа Францын хувьцаанууд болон еврогийн ханш огцом унажээ.

Ерөнхийлөгч Эммануэл Макроны ойрын хамтран зүтгэгч С.Лекорню олон долоо хоногийн турш улс төрийн намуудтай зөвлөлдсөний эцэст ням гарагт засгийн газраа эмхлэн байгуулсан бөгөөд шинэ Засгийн газар даваа гаргийн үдээс хойш анхны хуралдаанаа хийхээр төлөвлөж байсан юм.

Гэвч Франц улс төрийн гүн хямралд автаж, хуваагдмал парламентад аль нэг нам олонх болж чадаагүй энэ үед танилцуулсан Засгийн газрын шинэ бүрэлдэхүүн өрсөлдөгчид болон холбоотнуудын дургүйцлийг хүргэсэн байна. Тэд шинэ бүрэлдэхүүнийг хэтэрхий барууныг баримталсан, мөн хангалтгүй гэж үзсэнээр засгийн газар хэр удаан оршин тогтнох бол гэсэн асуулт урган гарчээ.

С.Лекорню даваа гаргийн өглөө огцрох өргөдлөө Э.Макронд өгсөн байна. “Ноён Себастьен Лекорню Засгийн газраа огцруулах хүсэлтээ Бүгд Найрамдах Франц Улсын Ерөнхийлөгчид өргөн мэдүүлсэн. Ерөнхийлөгч түүнийг хүлээн авсан” гэж Елисейн ордны хэвлэлийн албанаас мэдээлжээ.

2022 онд Э.Макрон улиран сонгогдсон хэдий ч парламентад аль нэг нам, бүлэг олонх болж чадаагүйгээс хойш Францын улс төр тогтворгүй болоод байгаа юм. Э.Макрон өнгөрсөн онд парламентын ээлжит бус сонгууль зарлах шийдвэр гаргасан нь хямралыг улам гүнзгийрүүлж, парламент дахь хуваагдлыг улам гүнзгийрүүлжээ. Өнгөрсөн сард томилогдсон С.Лекорню бол сүүлийн хоёр жилийн хугацаанд Э.Макроны томилсон тав дахь Ерөнхий сайд болсон юм.

Энэ оны физиологи, анагаах ухааны салбарын Нобелийн шагналын эзнээр Америкийн эрдэмтэн Мэри Э.Бранкоу, Фреду Рамсделлу, Японы эрдэмтэн Шакагүчи Шимонү нар тодорлоо. Уг шагналыг “өөрийн эрүүл эд эс рүү дайрахаас сэргийлдэг дархлааны тогтолцооны механизмыг нээсний төлөө” тэдэнд олгосон байна.

"Дархлалын тогтолцооны "хамгаалагч" болох зохицуулагч Т эсүүдийн үйл ажиллагаа, шинж чанарыг тодорхойлж, улмаар судалгааны шинэ чиглэлийн суурийг тавьсны учир тэдэнд шагналыг олгохоор шийдвэрлэлээ" гэж Нобелийн хорооны хэвлэлийн мэдээнд онцолжээ.

Энэхүү нээлтийн ачаар өдгөө эмнэл зүйн туршилтын шатанд боловсруулж буй эмчилгээний аргуудыг боловсруулжээ.

Эдгээр арга нь биеийн дархлааны тогтолцоо өөрийн эрүүл эд эсүүд рүү дайрах үед үүсдэг аутоиммун өвчнийг анагаах, хорт хавдрыг илүү үр дүнтэй эмчлэх, үүдэл эс шилжүүлэн суулгасны дараа ноцтой хүндрэл үүсэхээс урьдчилан сэргийлэх боломжийг олгоно хэмээн эрдэмтэд найдаж байна.

Өнгөрсөн оны физиологи, анагаах ухааны салбарын Нобелийн шагналыг Америкийн эрдэмтэн Виктор Эмброс, Гэри Равкан нар хүртсэн билээ. Уг шагналыг генийн үйл ажиллагааг хянахын тулд эсүүдэд ашиглагддаг амин чухал зохицуулалтын механизмыг нээсний төлөө тэдэнд олгожээ.

/CNN/. Эверест уулын Төвөдийн талаас гардаг зүүн энгэрийн ойролцоо цасан шуурганы улмаас гацсан олон зуун явган аялагчийг аврагчид аюулгүй газар руу замчилж байна гэж Хятадын төрийн хэвлэлд мэдээлжээ.

Ням гаргийн байдлаар 350 явган аялагч Кудан хэмээх жижиг тосгонд хүрсэн бол үлдсэн 200 гаруй аялагчтай холбоо тогтоогоод байна гэж Хятадын төв телевиз /CCTV/ мэдээлжээ. Хятадад үндэсний баяраар найм хоногийн турш амарч байгаатай холбогдуулан Эверестийн зүүн талаас гардаг энгэр рүү хөтөлдөг Карма хөндийд энэ долоо хоногт аялагчид олон зуугаараа ирсэн байна.

Ойролцоогоор 4200 м-ийн өндөрт оршдог уг хөндийд цас баасан гаргийн оройноос эхлэн бямба гаргийн турш үргэлжлэн оржээ. Үлдсэн аялагчид орон нутгийн засаг захиргаанаас зохион байгуулсан аврагчдын заавар тусламжийн дор Кудан руу ээлж дараагаар ирнэ гэж CCTV мэдээлсэн байна. Орон нутгийн олон зуун оршин суугч болон аврах багийнхан тус бүс рүү орох замыг хаасан цасыг цэвэрлэхээр ажиллаж байна гэж төрийн дэмжлэгтэй “Jimu News” цахим хуудсанд өмнө нь мэдээлсэн юм. “Jimu News”-ийн тооцоолсноор, 1000 орчим хүн гацсан байна.

Харин Төвөдийн талаас гардаг Эверестийн хойд энгэрт явган аялагчид гацсан эсэх нь тодорхойгүй байна. Эверестийн хойд энгэрт хатуу хучилттай замаар хялбархан хүрдэг тул жуулчид олноороо байнга очдог. Аравдугаар сард Энэтхэгийн борооны улирал дууссанаар тэнгэр цэлмэдэг тул аяллын оргил үе тохиодог. Орон нутгийн аялал жуулчлалын компанийн албан ёсны “WeChat” хуудсанд мэдээлснээр, бямба гаргийн оройноос эхлэн Төвөдийн талаас Эверест рүү авирах тасалбар худалдаалах, нэвтрэх эрх олгохыг зогсоожээ.

Төвөдөөс өмнөд зүгт орших Балбад хүчтэй аадар бороо орсны улмаас хөрс нурж, үер бууснаас үүдэн зам хаагдаж, гүүрнүүд нурснаар баасан гаргаас хойш 47 хүн амиа алдсан байна. Тодруулбал, Энэтхэгтэй хиллэдэг Илам дүүрэгт хөрс нурсны улмаас 35 хүн амиа алджээ. Түүнчлэн үерийн усанд урссан есөн хүн сураггүй болж, өөр гурван хүн аянгад цохиулж амиа алдсан байна.

/Kazinform/. БНХАУ-ын Хөдөө аж ахуй, хөдөө орон нутгийн хэрэг эрхлэх сайд асан Тан Жэньжянд асар их хэмжээний хээл хахууль авсан хэргээр ялыг гүйцэтгэх хугацааг хоёр жил хойшлуулах заалттайгаар цаазаар авах ялыг ням гарагт оноосон тухай Синьхуа агентлаг мэдээлжээ.

Жилинь мужийн Чанчунь хотын дунд шатны Ардын шүүхээс гаргасан шийдвэрт дурдсанаар, Хөдөө аж ахуй, хөдөө орон нутгийн хэрэг эрхлэх яамны удирдлага дахь намын бүлгийн нарийн бичгийн даргын албыг мөн хашиж байсан Тан Жэньжяний улс төрийн албан тушаал хаших эрхийг бүх насаар нь хасжээ.  Түүний бүх хувийн өмч хөрөнгө, хууль бусаар олсон орлогыг улсад хураан авсан байна.

Тан Жэньжянд  улс, ард түмний эрх ашигт ноцтой хохирол учруулсны учир цаазаар авах ял оноох ёстой гэж шүүх үзэж байна. Гэвч гэм буруугаа хүлээсэн, хууль бусаар олсон орлогоо буцаасан болон бусад хөнгөрүүлэх нөхцөл байдлыг харгалзан шүүх эцсийн шийдвэрээ гаргахдаа хүлцэнгүй хандсан байна.

Тан Жэньжян БНХАУ-ын Хөдөө аж ахуй, хөдөө орон нутгийн хэрэг эрхлэх яамны ХКН-ын салбарын нарийн бичгийн даргаар 2020 оны 12 дугаар сард томилогджээ.

Австралид өсвөр насныханд нийгмийн сүлжээ ашиглахыг хориглох тухай дэлхийд анхных болсон хуулийг баталсныг тус улсын Ерөнхий сайд Энтони Албанезе НҮБ-ын Ерөнхий Ассамблейн чуулганы хүрээнд болсон үйл ажиллагааны үеэр сайшаагаад, хүүхдүүдэд нийгмийн сүлжээнээс учрах сорилт бэрхшээл “хувьсан өөрчлөгдсөөр байгааг” анхааруулжээ.

Ирэх 12 дугаар сараас эхлэн 16-гаас доош насныхныг нийгмийн сүлжээ ашиглахыг хориглосон анхны улс болох гэж буй Австралийн хүчин чармайлтыг дэлхийн бусад орны засгийн газрууд болон технологийн компаниуд анхааралтай ажиглаж байна.

Австралийн эрх баригчид хэрэглэгчдийн насыг тооцоолоход хиймэл оюун ухаан, тэдний нийгмийн сүлжээн дэх хэрэглээтэй холбоотой өгөгдлийг ашиглаж, насыг баталгаажуулахдаа илүү хянуур хандахыг нийгмийн сүлжээний компаниудаас хүсэж байгаа ажээ.

Нью-Йорк хотноо болж буй НҮБ-ын Ерөнхий Ассамблейн чуулганы үеэр болсон Дижитал эрин үед хүүхдүүдийг хамгаалах асуудлаарх үйл ажиллагааны үеэр Э.Албанезе хэлэхдээ, энэ бол хялбар биш боловч зөв чиглэлд хийж буй чухал алхам юм гэлээ.

“Австралийн жишээ урам зориг төрүүлж байна. Европын эрх баригчид та бүхнийг харж, та бүгдээс суралцах болно... ирээдүй хойч үеийнхний төлөө ямар алхам хийх нь биднээс хамаарна” гэж Европын Комиссын Ерөнхийлөгч Урсула фон дер Лейен мэдэгджээ.

Австралид хүүхдүүдэд нийгмийн сүлжээ ашиглахыг хориглох тухай хуулийг 2024 оны 11 дүгээр сард баталсан юм. Э.Албанезегийн Засгийн газар өсвөр үеийнхний дунд нийгмийн сүлжээг хэтрүүлэн ашигласнаас үүдэн сэтгэцийн эрүүл мэндэд сөрөг нөлөө учирч байгааг харуулсан судалгааг эш татан уг хуулийг санаачилжээ.

А.Албанезе засгийн газрынхаа хүчин чармайлтыг амьдралынхаа эгзэгтэй үе шатанд байгаа хүүхдүүдийг хамгаалах ухаалаг боловч хожимдсон алхам гэж тодорхойлсон байна. “Бидэнд тулгарч буй сорилт бэрхшээл байнга хувьсан өөрчлөгдсөөр байгаа бөгөөд улс орнууд үүнийг янз бүрийн аргаар шийдэж байна" гэж тэрбээр хэлжээ.